El domingu 12 d’abril de 2015 celebróse en La Pola Llaviana el Primer «Tornéu pola convivencia y la tolerancia». L’entamu d’esta actividá foi iniciativa de la Plataforma Antifacista del Nalón na que participen organizaciones polítiques, vecinales y sindicales de tola Cuenca’l Nalón ente les que s’inclúi la UJCE n’Asturies.
L’oxetivu del eventu yera concenciar a la sociedá asturiano de la esistencia de sogrupos minoritarios qu’afalen al odiu ente seres humanos y tamién amosar un fuerte refugu ante les sos idees y plantegamientos racistes y xenófobos. Por eso, la Plataforma decantóse por un tornéu de fútbol 7 pa llegar al mayor númberu de persones posible.
La xornada trescurrió con normalidá, sintiéndose un ambiente d’interculturalidá y d’hermanamientu perarriquecedor pa los asistentes. El posible ataque de dalgún miembru d’estos grupúsculos quedó solo nuna visita breve, siguida d’una espantada ante la gran rempuesta social a los sos plantegamientos racistes y de dalguna quexa inxustificada al traviés de les redes sociales.
Tocantes a l’acoyida foi perbona, superando toles mires que se pusieron dende la propia organización. Fixéronse 10 equipos, teniendo que quedáse ensin xugar gran parte de los organizadores pa poder finar enantes de que s’acabare’l día. A lo qu’hai que sumar la montonera de xente que sofitó dende la grada. Esto fai que seya un fechu’l refugu por parte de la sociedá de los comportamientos racistes y xenófobos d’esta gandaya.
Pa rematar l’actividá fíxose una xinta popular na que los participantes llevaron la so comida pa lluéu compartíla ente toes, asina como apurrióse-yos a los ganadores y a los finalistes una copa que certificara la so participación nel tornéu. La música intercultural acompañó durante tola xornada.
Con esto dicir que dende la UJCE n’Asturies siguiremos trabayando pa sacar más actividaes alantre y nun permitiremos que l’odiu y la barbarie s’apoderen de les nuestres cais.
