Otru añu más, cellébrase na capital d’Asturies ún de los eventos más importantes del panorama políticu asturianu: los Premios Princesa de Asturias. Desde la Mocedá Comunista siguimos denunciando que frente a la situación d’incertidume y precariedá que vive la nuesa mocedá, les instituciones y los poderes públicos siguen apostando pol blancamientu de la monarquía, principal institución que sostien el Réxime del 78, como del entramáu empresarial que se xenera al so alredor utilizando esti eventu como escaparate.
Esti añu, el escenariu principal de los Premios Princesa va ser l’hotel Reconquista. Esti hotel alcuéntrase xestionáu pol grupu HOTUSA, empresa multinacional hostelera con acusaciones y sentencies al llombu en materia d’abusos llaborales, ataques escontra sindicalistes y l’usu de despidos improcedentes frente a la organización de les trabayadores. Una vegada más se demuestra qu’a la corona y la casa real importa-yos poco la clas obrera asturiana y cuésta-yos poco facer tratos con empresarios que solo conocen la precariedá, la esplotación y l’amenaza como forma de relación cola clase obrera.
Los Premios Princesa van realizase nun contestu onde adulces van saliendo escándalos que muestren realmente’l calter que tien la monarquía: una institución qu’utiliza la so posición pal arriquecimientu illícitu d’una familia y namá defende los intereses de la clas dominante frente a los de la clas obrera. Per otru llau les clases populares somos les que tamos sufriendo la crisis demográfica, una de les peores d’España, la desindustrialización, la precarización del emplegu y les dificultaes d’emancipación y de construcción d’un proyectu de vida como señes d’identidá del desendolcu del capitalismu n’Asturies.
L’espectáculu constrúyese sobre una tierra na que’l subsidiu ganó sobre l’emplegu, onde la meyor salida pa la mocedá ye la estación d’autobuses y trenes o l’aeropuertu y onde la precariedá ye la única certidume qu’hai. Tenemos que repensar el nuesu futuru y esto pasa por poné-y nome a la barbaridá que la clas dominante fixo na nuesa tierra, onde la so tasa de ganancia tan pencima les nueses vides y en segundu llugar desendolcando espacios que nos dexen construyir y desenvolver poder popular, onde la clas obrera síamos la protagonista y quien decidamos sobro’l futuru de la nuesa tierra.
La nuesa emancipación pasa por finar con esti sistema que nos echa de la nuesa tierra. Los Premios Princesa son una exhibición del mesmu, una ferramienta mediática de llexitimación al traviés de la entrega de premios y pomposos discursos alloñaos de les preocupaciones reales de la mocedá, nos que nos dicen que son tiempos difíciles y que van llegar meyores, pero como n’otres ocasiones solo va ver la lluz al final del túnel la clas que nos esplota y oprime si nun somos la clas obrera quien tomemos les riendes del nuesu destín. Si nun sabemos analizar fonderamente el calter que tien el sistema capitalista y cómo atraviesa toa institución de la que forma parte, vamos atacar el síntoma, pero non la enfermedá. El sistema capitalista español construyóse históricamente al rodiu de la figura de la monarquía y nun puede entenderse la una al marxen de la otra. Herencia del réxime dictatorial por conveniencia del gran capital de la dómina, sostién políticamente un sistema de dominación económica, política y cultural d’una clas dominante qu’intentó desaniciar cualquier forma de subversión popular.
Ante la imposibilidá de tresformar esti sistema dende les instituciones, llamaos a la mocedá obrero d’Asturies a organizase al rodiu d’un proyeutu rupturista que xunte a la clas obrera, plantegando una propuesta política definida al rodiu a los exes del antimonopolismu, l’antiimperialismu, el feminismu y la solidaridá internacional, ente otros, dentro de la forma de República. Tenemos qu’abrir el camín a organizar nos barrios, nos pueblos, nos centros de trabayu y nos centros d’estudiu un proyectu que supere l’estáu actual de les coses. Mientres España ta viviendo un de los peores momentos económica y socialmente de resultes de la falsa necesidá de caltener el sistema capitalista, el sistema del beneficiu infinitu, tamos viendo ún de los efectos más destructores pa la nuesa clas. Plantegamos, ante’l so modelu, caducu, una República qu’entame’l camín al socialismu, a un sistema d’emancipación de la clas trabayadora qu’acabe colos pegoyos estructurales del réxime del 78, pa dar llugar a un escenariu onde’l marcu democráticu seya plenu, real y nosotres mismes síamos les dueñes del nuesu futuru.
